Post Details

UONGOZI WA WILAYA TEMEKE WAFURAHISHWA NA JENGO JIPYA LA MAHAKAMA JUMUISHI

Published By:Mary C. Gwera

Mkuu wa Wilaya ya Temeke, Mhe. Jokate Mwegelo pamoja na baadhi ya Viongozi wa Wilaya hiyo wakiwemo Wahe. Wabunge wameonyesha kuridhishwa na jitihada za Mahakama ya Tanzania kufuatia ujenzi wa Kituo cha Haki Jumuishi (IJC) kilichojengwa katika Wilaya hiyo.

Agosti 05, 2021, Majaji wa Mahakama Kuu, Mhe. Paul Ngwembe na Mhe. Ilvin Mugeta na baadhi ya Maafisa wa Mahakama walikutana na Viongozi wa Wilaya hiyo, lengo likiwa ni kutembelea na kuwafahamisha juu ya uwepo wa jengo hilo jipya la Kituo Jumuishi cha utoaji haki.

Wakizungumza na Mkuu wa Wilaya ya Temeke ofisini kwake kabla ya kutembelea jengo hilo, Waheshimiwa Majaji hao walimueleza dhumuni la kujenga jengo hilo kuwa litakuwa linahusika na na utoaji huduma ya masuala ya Mirathi, Ndoa na Watoto.

“Lengo la Mahakama Jumuishi ni kutoa huduma ya haki katika jengo moja, na jengo hili ni mahsusi kwa ajili ya kushughulikia masuala ya Mirathi, Ndoa na Watoto, kwakuwa hay ani masuala yanayoisumbua jamii kwa kiasi kikubwa,” alisema Mhe. Jaji Paul Ngwembe.

Kwa upande wake, Mhe. Jokate aliwashukuru Viongozi hao wa Mahakama kwa kuipa kipaumbele Wilaya ya Temeke kusogeza huduma ya muhimu kwa wananchi.

“Napenda nikiri kuwa nimefurahishwa na jengo hili maridadi kabisa, ambalo linakuja kuwa suluhisho kwa wananchi wetu wa Wilaya ya Temeke na tunawaahidi kutoa ushirikiano,” alisema Mkuu huyo wa Wilaya.

Huduma za Mahakama katika jengo hili zitaanza kutolewa hivi karibuni, na hili ni moja kati ya majengo sita ya aina hii yanayojengwa pia Kinondoni- Dar es Salaam, Morogoro, Dodoma, Mwanza na Arusha lengo likiwa ni kuendelea kuboresha na kurahisisha huduma ya upatikanaji haki kwa wananchi.

Comments (0)

Leave a Comment