Post Details

TAMBUENI WAJIBU WENU NA KUTOA HUDUMA BORA: JAJI MKUU

Published By:LYDIA CHURI

Jaji Mkuu wa Tanzania Mhe. Prof. Ibrahim Hamis Juma amewataka watumishi wa  Mahakama kutambua wajibu wao na kutumia muda wa kazi  ipasavyo kwa kufanya kazi kwa bidii ili kuiwezesha Mahakama kutekeleza wajibu wake wa kutoa  huduma bora kwa wananchi.

Jaji Mkuu ambaye pia ni Mwenyekiti wa Mkutano wa Baraza la wafanyakazi wa Mahakama ya Tanzania ameyasema hayo leo jijini Dodoma wakati alipokuwa akifungua kikao cha siku mbili cha cha Baraza la Wafanyakazi wa Mahakama.

Mhe. Prof. Juma pia amewakumbusha viongozi mbalimbali wa Mahakama kuwapa watumishi taarifa muhimu zinazohusu maendeleo ya Taasisi mara kwa mara hususan taarifa kuhusu maboresho, taratibu mpya, mafanikio na changamoto za kila siku.

“Majadiliano, kueleweshana, kupokea mawazo na mapendekezo ya wafanyakazi ni wajibu wetu wa kila siku bila kusubiri vikao”, alisema Jaji Mkuu na kuwasisitiza viongozi hao kuwa na vikao vya mara kwa mara na watumishi ili kutatua baadhi ya changamoto zinazowakabili.

Alisema ili watumishi waelewe malengo na muelekeo wa Mhimili ni lazima Viongozi wajenge mazingira ambayo watumishi wote watakuwa wanapata taarifa za mara kwa mara kuhusu mambo muhimu yanayogusa ajira, maslahi na mazingira ya kazi.

Alisema umuhimu wa Baraza la Wafanyakazi ni kutoa fursa kwa watumishi kujadiliana na uongozi wa Taasisi zao juu ya masuala ya msingi yanayohusu tija na ufanisi kwa upande mmoja na maslahi yao kama watumishi kwa upande mwingine.

Kwa mujibu wa Jaji Mkuu, hatua kubwa za kimaendeleo zilizofikiwa na Mahakama ya Tanzania katika kipindi cha miaka minne (4) hasa katika uboreshaji wa Mahakama zimechangiwa na watumishi wote wa Mahakama wa ngazi na fani zote.

“Nyuma ya kila mafanikio ya Mahakama wapo watumishi wengi wa kawaida, waadilifu, wanaochapa kazi kwa kujituma, na ambao hufanya kazi zao bila kujisifu, lakini matokeo ya kazi na juhudi zao ni kubwa kwa kuwa ndio wanaotoa sura ya mafanikio ya Mahakama inayosifiwa”, alisema.

Aliwataka viongozi katika sehemu zote na ngazi zote ndani ya Mahakama  kuhakikisha watumishi wanahusishwa, wanathaminiwa, wanahamasishwa na wanawekewa mazingira bora ili watoe huduma zenye tija na kuwa wenye furaha siku zote.

Akizungumzia sheria ya Uendeshaji wa Mahakama Namba 4 ya mwaka 2011, Jaji Mkuu amesema  sheria hii imejenga tabia mpya ya uwazi, uwajibikaji na matumizi bora ya rasilmali. Sheria hii pia imejenga tabia mpya ya kufanya kazi, kukubali, kuheshimu na kukaribisha baadhi ya utaaalamu wa ndani, katika fani mbali mbali kama vile TEHAMA, Uhandisi, Uchumi, na Mipango.

Naye Mtendaji Mkuu wa Mahakama ya Tanzania Bwn. Mathias Kabunduguru amesema Mahakama ya Tanzania haina budi kufanya mageuzi mbalimbali ili  kuboresha utendaji kazi na utoaji wa huduma kwa viwango vya kitaifa, kikanda, na kimataifa vinavyokubalika.

Kuhusu rushwa, Bwn. Kabunduguru amesema juhudi zimefanyika kupambana nayo ikiwa ni pamoja na kuweka mifumo ya utendaji kazi iliyo wazi na yenye ufanisi ikiwemo wananchi kupewa fursa ya kulalamika, kupongeza na kutoa maoni kupitia simu za kiganjani zilizosambazwa nchi nzima na madawati ya malalamiko yaliyopo karibu kila ngazi ya Mahakama.

Mkutano wa tatu wa Baraza kuu la sita la wafanyakazi wa Mahakama ya Tanzania wa umeanza leo jijini Dodoma ambapo wawakilishi wa watumishi wa Mahakama kutoka maeneo mbalimbali nchini wanahudhuria.

Comments (0)

Leave a Comment