Home / News / Maadhimisho ya siku ya sheria nchini

Maadhimisho ya siku ya sheria nchini

Taarifa ya Mhe. Jaji Mkuu wa Tanzania kuhusu maonesho ya maadhimisho ya wiki ya sheria nchini

Mahakama-TanzaniaMhe. Mtendaji Mkuu wa Mahakama ya Tanzania Mhe. Msajili Mkuu wa Mahakama ya Tanzania Waandishi wa Habari wote mliopo hapa Kwa niaba ya Mahakama ya Tanzania na kwa niaba yangu binafsi napenda kuwakaribisha na kuwatakia Heri ya Mwaka mpya 2015. Kama mnavyofahamu, kila mwaka Mahakama huadhimisha Siku ya Sheria ambayo inaashiria mwanzo wa shughuli za Mahakama kwa mwaka husika. Kwa mara ya kwanza, Mahakama ya Tanzania itafanya Maonesho ya Wiki ya Sheria kama sehemu ya Maadhimisho ya siku hiyo muhimu. Maonesho hayo yanatarajiwa kuanza rasmi tarehe 30.01.2015 na kufikia tamati tarehe 03.02.2015 katika Viwanja vya Mnazi Mmoja jijini Dar es Salaam. Aidha, Maonesho haya yanalenga kutoa elimu kwa wadau wa Sheria na kutoa huduma za kisheria kwa wananchi. Katika kuleta maboresho endelevu Mahakama imedhamiria kutoa elimu kwa Umma kuhusu masuala mbalimbali yakiwemo yafuatayo:-  Ufunguaji na uendeshaji wa Mashauri mbalimbali hasa ya mirathi.  Utatuzi wa migogoro kwa njia ya suluhu muafaka (Alternative Dispute Resolution).  Mfumo mpya wa kulipia tozo mbalimbali za Kimahakama kwa njia ya benki. Katika kufanikisha Maadhimisho haya, Mahakama kama mwenyeji wa shughuli hii itakuwa ndio mratibu Mkuu wa kuhakikisha kuwa lengo na madhumuni ya kuanzisha Wiki ya Maonyesho ya Sheria yanafanikiwa ipasavyo, kwa kuwashirikisha wadau wengi wanaojihusisha na masuala ya Sheria, haki za binadamu pamoja na wataalamu na wanafunzi wa Sheria. Wadau wakuu katika Wiki ya Maonesho ya Sheria ni pamoja na; • Mahakama • Tume ya Utumishi wa Mahakama • Ofisi ya Mwanasheria Mkuu Wa Serikali • Ofisi ya Mkurugenzi Wa Mashitaka • Chuo Cha Uongozi Wa Mahakama-Lushoto • Taasisi ya Mafunzo Ya Uanasheria Kwa Vitendo Tanzania (The Law School Of Tanzania) • Tume ya Haki Za Binadamu na Utawala Bora • Taasisi Zinazotoa Msaada Wa Kisheria (Legal Aid) • Takukuru • Polisi • Magereza • Chama Cha Mawakili Tanganyika • Tume ya Kurekebisha Sheria Katika Maonesho hayo kutakukwepo pia huduma mbalimbali zitakazotolewa kama: • Kutolewa vyeti vya Mawakili • Msaada Wa Kisheria (Legal Aid) • Kupokea malalamiko na kuyatafutia ufumbuzi. Pamoja na Maonesho haya, kutakuwa na Matembezi maalum ya kuadhimisha Wiki ya Sheria tarehe. 01.02.2015 ambayo yataongozwa na Rais Mstaafu wa Jamhuri ya Muungano wa Tanzania, Mhe. Ali Hassan Mwinyi. Matembezi haya yataanzia Mahakama ya Hakimu Mkazi Kisutu kupitia barabara za, Serena-Ohio, Gymkhana-Obama Road, Ikulu, Mahakama ya Biashara, Barabara ya Kivukoni, Sokoine, Railway, Nkrumah, Lumumba, Mkunguni hadi Mnazi Mmoja ambapo Mhe. Rais Mstaafu atafanya uzinduzi rasmi wa Maonesho hayo. Aidha Maudhui ya Maadhimisho ya wiki ya sheria na siku ya sheria nchini kwa mwaka huu ni: ‘’Fursa ya kupata haki: wajibu wa Serikali, Mahakama na Wadau.’’ Sherehe za kilele cha maadhimisho ya siku ya sheria nchini zitafanyika tarehe 04.02.2015, katika viwanja vya Mahakama vilivyopo mtaa wa Chimala jijini Dar es Salaam, ambapo mgeni rasmi atakuwa Rais wa Jamhuri ya Muungano wa Tanzania, Mhe. Dkt. Jakaya Mrisho Kikwete. Sherehe hizo zitaanza rasmi kuanzia saa 03:00 asubuhi. Napenda kutoa rai kwa wananchi na wadau wote wa sheria kutembelea Maonesho hayo kwa ajili ya kujifunza na kupata huduma mbalimbali za kisheria.

ASANTENI KWA KUNISIKILIZA.

Mhe. Mohamed Chande Othman, Jaji Mkuu wa Tanzania akiongea na Waandishi wa Habari alipokuwa katika Mkutano kuongelea juu ya Maadhimisho ya Siku ya Sheria nchini, kushoto ni Mhe. Hussein Kattanga, Mtendaji Mkuu- Mahakama ya Tanzania, Kulia ni Mhe. Ignas P. Kitusi, Msajili Mkuu- Mahakama ya Tanzania.

Mhe. Mohamed Chande Othman, Jaji Mkuu wa Tanzania akiongea na Waandishi wa Habari
alipokuwa katika Mkutano kuongelea juu ya Maadhimisho ya Siku ya Sheria nchini, kushoto
ni Mhe. Hussein Kattanga, Mtendaji Mkuu- Mahakama ya Tanzania, Kulia ni Mhe. Ignas
P. Kitusi, Msajili Mkuu- Mahakama ya Tanzania.